«Որսի տեխնոլոգիա» առարկայի քննության ժամանակ գայլաձագը չհոշոտեց հանձնարարված քննական օբյեկտին: Քննական հանձնաժողովը նրան միաձայն անբավարար նշանակեց: Միաձայն, որովհետև ուսուցիչ արջը զրկվել էր ձայնի իրավունքից, քանզի հանձնաժողովի քարտուղար բորենին նրան տեսել էր տանձ ճաշակելիս:
Հարց` ի՞նչ տվեց դպրոցը նրան, ով հետո դարձավ միայնակ գայլ:
Հավաքվեցին մկներն առցանց քննարկման: Նպատակն էր կատվին մեկուսացնել սոցցանցերից, որովհետև բացասաբար էր ազդում մկնային սերունդների վրա: «Դրայվոտ» սերնդի ներկայացուցիչների առաջարկությունները հաջորդում էին մեկը մյուսին, բախվում և անձև կույտ դառնում: Ավագ սերունդը հուսահատ անիծում էր տեխնիկական առաջընթացը և կարոտախտով հիշում սովորական զանգը: Ազատական մկները կատվի հետ փոխհամաձայնության հարթակ էին փնտրում և տարբերակների բազմազանությունից կորցնում իրենց ինքնությունը: Իսկ մկնիկներից մեկը բարձր ծվծվաց. «Ախր կատուն հետաքրքիր կենդանի է»:
Իսկ այդ նույն ժամանակ ֆիզիկական իրականությունում կատուն բռնել էր հերթական մկան պոչից:
Մոծակիկն ու գորտիկը սովորում էին նույն դասարանում: Մոծակիկը շատ հետաքրքրասեր էր: Նա չէր բավարարվում ուսուցիչների բոլոր հանձնարարությունները կատարելով: Մոծակիկը թռչում էր ամենուր և ուսումնասիրում ամեն ինչ: Իսկ գորտիկից ուսուցիչները շատ դժգոհ էին, որովհետև նրան հետաքրքրում էին միայն ճահճի հետ կապված հարցերը:
Ուսումնական տարվա ավարտին գորտիկը մնաց նույն դասարանում: Իսկ մոծակիկը հայտարարվեց լավագույն աշակերտ… հետմահու:
Հարց` ո՞ր ժամանակաշրջանում էին դպրոց հաճախում մեր պատմության հերոսն ու հակահերոսը:
Սիրեցին իրար ամպերը: Եվ ծնվեց անձրևը:
Սիրեցին իրար ձին ու էշը: Եվ ծնվեց անպտղությունը:
Սիրեցին իրար սերն ու ատելությունը: Եվ ծնվեց մարդկությունը:
Սիրեցին իրար մարդն ու փառքը: Եվ ծնվեց կայսրությունը:
Սիրեցին իրար մարդն ու հուսահատությունը: Եվ ծնվեց մահը:
Սիրեցի ինքս ինձ: Եվ ծնվեցին այս տողերը:
Խոտը լռում է, որովհետև մենք չենք ցանկանում լսել նրան:
Ձուկը լռում է, որովհետև չի ցանկանում կիսվել մեզ հետ:
Մարդը լռում է, որովհետև լռությունը խոսքից բազմիմաստ է:
Ես չեմ լռում, որովհետև մուսան մտրակում է հոգիս:
Եվ կրկին հանդիպեցին տղան ու աղջիկը:
Ամառը չգոլորշիացրեց նրանց զգացմունքները:
Աշունը հարսանիք էր կանխատեսում:
Ձմեռը հիշեցրեց անցյալը:
Գարնանը սելավ էր:
Տնային Միջատների Հանրապետության խորհրդարանի հերթական նիստի ժամանակ պատգամավոր Խավարասերը բարձրացրեց արտասահմանում ապրող բարեկամների հիմնախնդիրը: Այդ հողի վրա բանավեճ ծագեց նրա և պատգամավոր Սարդի միջև: Խորհրդարանը ձայների մեծամասնությամբ որոշեց, որ արտասահմանում ապրում են ոչ թե միջատներ, այլ` միջատանմաններ: Կարճ ժամանակ անց հանրապետությունն ընկավ և միջատաուռաների տարափի ներքո հաստատվեց ճանճերի ժառանգական միապետությունը:
Լեոնարդո դա Վինչիի մայրու սերունդները դասեր քաղեցին իրենց նախնու տապալումից: Անցան դարեր: XXI դարում այդ ժառանգներից մի մայրի շարունակում էր հանդուրժել պտղատու ծառերին: Բայց շատ էր սիրում մագլցող բույսերին, հատկապես` նրանց սիրառատ և հոգեպարար գգվանքները: Եվ տապալվեց ներքին փոթորկից:
Հին Հռոմ: Ես ստրուկ եմ: Մարմինս կտավն է, մտրակը` վրձինը: Նատուրալիստական պատկեր:
Նոր Հայաստան: Հոգիս կտավն է, զգացմունքները` վրձինը: Գերիրապաշտական պատկեր
Հարց` ո՞վ եմ ես Նոր Հայաստանում:
Արթանացավ հրաբուխը միլիոնամյա քնից և զարմացավ, որ ցերեկ չէ: Նայեց Արեգակը Երկրին և զարմացավ, որ համատարած ամպամածություն է: Անձրևորդն անսպասելի արգելքի հանդիպեց և զարմացավ, որ իր փափկեցրած հողն այսքան շուտ պնդացել է:
Հարց` ա՞յդ օրն սկսվեց դինոզավրերի հեռացումը կենսահամակարգից:
